ПОСТАВУВАЊЕ НА ФАСАДА СО КАМЕНА ВОЛНА ВО 8 ЧЕКОРИ

Контактна фасада со камена волна може да се изведе на нов или постоечки објект. Кај новите објекти ситуацијата е прилично едноставна и може веднаш да се започне со работа.

При реновирање, т.е. кај постојните објекти, пред започнување на работите, потребно е да се провери состојбата на постоечката фасада, користејќи методи кои воглавно им се добро познати на мајсторите.

Еве ги основните чекори за поставување на контактен фасаден систем со камена волна:

1. КОНТРОЛА НА ПОДЛОГАТА

- Проверка со око, тропање, метода на гребење и парање, тест на квасење, испитување со израмнувач колку е рамна подлогата ...

- Нерамнините на површината на фасадата треба да се коригираат со малтерисување, а не со додавање на големо количество лепак при лепење на плочи од камена волна.

2. ПОСТАВУВАЊЕ НА ПОЧЕТНИОТ ПРОФИЛ

- Се поставуваат алуминиумски профили во ширина еднаква на дебелината на камената минерална волна. За постојните згради, тоа е минимум 8cm, а за новите минимум 10cm. Принципот е: колку е подебела изолацијата, толку е поголема заштедата.

- Се проверува хоризонталната нивелација на профилот, со цел да се создаде добра подлога за понатамошна инсталација на плочите; ако подлогата е нерамна, таму каде што е потребно се поставуваат дистанцери.

3. ЛЕПЕЊЕ НА ПЛОЧИТЕ

- Да се користат лепила наменети за камена волна, секој реномиран производител ги има во понудата.

- Во зависност од препораките на производителот на лепилото, плочата се импрегнира по рабовите или по целата површина (со нанесување на тенок слој лепак).

- Воздух не смее да циркулира помеѓу плочата и подлогата, па затоа е потребно да се нанесе слој лепак околу целата табла (т.н. рабна лента со ширина од околу 5 cm), како и во средината, во форма на т.н погачи, на 2-3 места, секоја со дијаметар од околу 15 cm. Вкупната покриеност со лепак треба да биде околу 40%. Само ваквото лепење обезбедува издржливост на фасадата. Изоставување на рабно лепење е најчеста причина за паѓање на фасадите при силни налети на ветер.

- Плочите од камена волна се лепат од долу нагоре, од почетниот профил, блиску една до друга.

- Вториот ред се поставува со поместување за 1/2 плоча.

- Да се обрати внимание на лепењето на плочите кај аглите, т.е. споевите на плочите да не се на аглите на објектот (треба да се направи таканаречен чешел), како и околу отворот (Најдобро е да се скрои плочата околу отворот, а да се избегнува спој на 2 плочи на тие места. На овој начин ги спречуваме пукнатините во аглите кои често може да се забележат кај непрофесионално изведените фасади).

- На отворот околу прозорецот да се залепат т.н. шпалетни елементи со дебелина од најмалку 2 cm.

4. ТИПЛУВАЊЕ

- Поради својата тежина, камената волна мора дополнително да се прицврстува со типли наменети за камена волна (со челичен клин).

- Се препорачува најмалку 6 клинови на m2, односно по 3 на една плоча, а во рабните зони најмалку 8 парчиња/m2 поради посилното струење на ветрот.

5. АГОЛНО АРМИРАЊЕ

- На сите агли и отвори задолжително се користат аголни профили со интегрирана мрежа, кои дополнително ја штитат изолацијата на овие чувствителни места.

- Мрежичката се втиснува 2 mm во претходно нанесениот лепак, и тоа така што да лежи во надворешната третина од дебелината на лепилото.

- Околу отворите на фасадата дијагонално се поставуваат парчиња стаклена мрежа за да се спречи создавање на пукнатини.

- На прозорците се препорачуваат окапни профил - заради одводнување на дождовницата.

6. НАНЕСУВАЊЕ НА ЛЕПАК И СТАКЛНА МРЕЖИЧКА

- Нанесувањето на слој лепак врз плочите од камена минерална волна се врши со мистрија, од долу нагоре.

- Во горниот слој на свежо нанесен лепак (надворешна третина) се втиснува арматурна мрежичка (мрежичка од стаклени влакна), со преклопи од најмалку 10 cm.

7. ГЛЕТУВАЊЕ

- Кога претходно нанесениот лепак ќе се исуши, се пристапува кон нанесување на завршниот слој на лепакот за глетување.

- На овој начин добиваме рамна подлога за завршниот слој на фасадата.

- Вкупната дебелина на лепакот за стаклената мрежичка и лепакот за глетување треба да биде мин. 5 mm.

8. ЗАВРШЕН/ДЕКОРАТИВЕН СЛОЈ НА ФАСАДАТА

- Пред нанесувањето на завршниот слој, треба да се нанесе основен премаз (прајмер), откако лепилото за армирање и измазнување е целосно исушено; тој обезбедува добра адхезија на армирачкиот и декоративниот слој на фасадата.

- Декоративниот слој мора да биде силиконски, силикатен или силиконско-силикатен, т.е. компатибилен со камена минерална волна, во согласност со препораката на производителот.